മകളെ യാത്രയാക്കാനെത്തിയ അമ്മയ്ക്ക് ദാരുണന്ത്യം

വർക്കലയിൽ സ്വകാര്യ ബസിടിച്ച് വീട്ടമ്മയ്ക്ക് ദാരുണാന്ത്യം.കായിക്കര കോവിൽത്തോട്ടം സ്വദേശി പ്രതിഭ (47) ആണ് മരണപ്പെട്ടത്. ഇന്ന് രാവിലെ 6 മണിയോടെ മൈതാനം റെയിൽവേ സ്റ്റേഷൻ റോഡിലാണ് അപകടം നടന്നത്. ഭർത്താവിനും മകൾക്കും ഒപ്പം സ്കൂട്ടിയിൽ യാത്ര ചെയ്യവേ അമിതവേഗതയിൽ ഓവർ ടേക്ക് ചെയ്‌ത സ്വകാര്യ ബസ് ഇടിച്ചാണ് അപകടം ഉണ്ടായത്. സ്കൂട്ടിയുടെ പിന്നിലിരുന്ന പ്രതിഭ റോഡിലേക്ക് തെറിച്ചു വീഴുകയായിരുന്നു. പ്രതിഭയെ വർക്കല താലൂക്ക് ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. കൊല്ലത്ത് നഴ്സിങ്ങിന് പഠിക്കുന്ന മകളെ റെയിൽവേ സ്റ്റേഷനിൽ യാത്രയാക്കാനാണ് വിജയകുമാറിനൊപ്പം പ്രതിഭയും ഒപ്പം കൂടിയത്. വിജയകുമാറും മകൾ വിഷ്ണു പ്രിയയും നിസ്സാര പരിക്കുകളോടെ രക്ഷപ്പെട്ടു. മൃതദേഹം വർക്കല താലൂക്ക് ആശുപത്രി മോർച്ചറിയിലേക്ക് മാറ്റി.
വർക്കല – വെഞ്ഞാറമൂട് റൂട്ടിൽ സർവ്വീസ് നടത്തുന്ന ഹബീബി എന്ന ബസ്സാണ് ഇടിച്ചത്. അഞ്ചുതെങ്ങ് സ്വദേശിയായ ഡ്രൈവറെ വർക്കല പൊലീസ് കസ്റ്റഡിയിൽ എടുത്തു.